በድጅታል ኢኮኖሚ ግንባታ የተመዘገቡ ለውጦችን በአገር አቀፍ ደረጃ በማስፋት በድጅታል ክህሎት የበለጸገና በድጅታል ኢኮኖሚ ተጠቃሚነትን ያረጋገጠ ማህበረሰብ ለመፍጠር የሚያስችል የሴቶችና የወጣቶች አገር አቀፍ የንቅናቄ መድረክ በአዳማ ከተማ እየተካሄደ ነው።

መድረኩን በኢኖቬሽንና ቴክኖሎጂ ሚንስቴር የአይሲቲና የድጅታል ኢኮኖሚ ልማት ዘርፍ ሚንስትር ዲኤታ ይሽሩን ዓለማየሁ (ዶ/ር) በንግግር ከፍተውታል።

እንደ ዶክተር ይሽሩን በኢትዮጵያ በድጅታል ቴክኖሎጂ የበለጸገ እና በድጅታል ኢኮኖሚ የሚጠቀም ማህበረሰብ እንዲፈጠር አስቻይ ምቹ ሁኔታዎችን ተፈጥረዋል።

የተፈጠረውን ምቹ ሁኔታ በመጠቀም መላ ህብረተሰቡን በማነቃነቅ በተለይም ሴቶች እና ወጣቶች ከዘርፉ እንዲጠቀሙ በየደረጃው ያሉ አደረጃጀት አመራሮች ሚናቸው የጎላ በመሆኑ ይህ የድጅታል ክህሎት ማበልጸጊያ ስልጠና መድረክ ተዘጋጅቷል ብለዋል።

ዶክተር ይሽሩን አክለውም ወጣቶች በተለይም አብዛኛው የህብረተሰባችን ክፍል የሆኑት ሴቶች ከድጅታል ቴክኖሎጂ በእጅጉ ተጠቃሚ ስለሚሆኑ የሚመለከታቸው ባለድርሻ እና አጋር አካላት በመቀናጀት በትኩረት መረባረብ ይጠበቅብናል ብለዋል።

በስልጠናው የድጅታል ክህሎትን በተለይም ከፋይናንሻል ቴክኖሎጂ አኳያ ስልጠናውን እየሰጡ ያሉትን የሚንስቴር መስሪያ ቤቱን እና የኢትዮ ቴሌኮምን ባለሙያዎች ያመሰገኑት ሚንስትር ደኤታው በተለይም የኢትዮጵያን ድጅታላይዜሽን ከመረጃ ቅብብሎሽና አውታረ ግንኙነት(Beyond Connectivity) ባሻገር አልሞ እየሰራ የሚገኘውን አንጋፋ ተቋምንና ለስልጠናው ድጋፍ ያደረጉ አካላትን ሁሉ በሴቶችና ወጣቶች ስም አመስግነዋል።

በስልጠናው አመራሮቹ ያገኙትን እውቀትና ክህሎት እስከታች በማውረድ የኃላፊነታቸውን በላቀ ትጋት እንዲወጡ ከአደራም ጭምር አሳስበዋል።

በስልጠናው ከመላ ኢትዮጵያ የተውጣጡ 120 የሚደርሱ የሴቶችና ወጣቶች አደረጃጀት አመራሮች ተሳትፈውበታል።