ጠቅላይ ሚኒስትሩ በ2030 ዲጂታል ኢትዮጵያን እውን ለማድረግ ትልልቅ ሃሳቦች ያሏት፣ የራሷን ማንነት ገልጭ የሆነ እና እሴቶቿን የሚያንጸባርቅ ቴክኖሎጂ የምትጠቀም እንዲሁም አስፈላጊ ለሆኑ ፍላጎቶቻችን ምላሽ የሚሰጥ አሰራር ያላት ሀገር እንፈጥራለንም ብለዋል።

ይህንን እውን ለማድረግ የስማርት አሰራርን፥ ለኃይል መሠረተ ልማት፣ ለፈጣን ግንኙነት፣ ለመረጃ ቋት መፍጠር የመጀመሪያው እርምጃ መሆኑን ገልጸው፤ ይህም የእድገት መሰረት ጠንካራ እና ዘላቂ እንዲሆን ያስችላል ብለዋል።

በሁለተኛነት የዲጂታል ሉዓላዊነታችንን ለመጠበቅ የምንጠቅምባቸው ሲስተሞች ደህንነታቸው የተጠበቀ መሆን አለበት ነው ያሉት ጠቅላይ ሚኒስትሩ። መረጃን በኃላፊነት በመመራት፤ ልማትን ማፋጠን እና ህዝባችንን ማብቃት ይኖርብናልም ሲሉ ተናግረዋል።

ዲጂታል የትምህርት ግብዓቶችን ማቅረብ እና የኤ.አይ ዘርፍ እውቀትን ወደ ትምህርት ቤቶች በማሻገር ተማሪዎችን ብቁ ማድረግም እንደሚጠይቅ ጠቅላይ ሚኒስትሩ አሳስበዋል።

ዓላማችን ዜጎቻችን በዲጂታል ቴክኖሎጂ ማብቃት ነው ያሉም ሲሆን፤ ለዚህ ደግሞ ምክንያቱ ቴክኖሎጂ አቅም የሚሆነው በሚጠቀሙት ሰዎች አቅም ልክ በመሆኑ እንደሆነ ጠቁመዋል።

በትልልቅ ከተሞችም ሆነ በጣም ሩቅ በሆነው የገጠር መንደር ተደራሽ የሚሆን ዲጂታል ኢኮኖሚን እውን ማድረግ፤ እንዲሁም ማንኛውም ሰው በራሱ ቋንቋ በስልኩ ብቻ መግዛት፣ መሸጥ፣ ክሬዲት ማግኘት እንዲችል ማድረግ፤ ህልማችንን ለማሳካት ሌላው ትልቁ እርምጃ ነው ብለዋል ጠቅላይ ሚኒስትር ዐቢይ አሕመድ (ዶ/ር)።