የኢኖቬሽንና ቴክኖሎጂ ሚኒስቴር በሀገራችን በተበታተነ መልኩ እየተካሄዱ ላሉ የምርምር ስነ-ምግባር ሥራዎች ወጥ የሆነ ስርዓት እንዲኖር የሚያስችሉ የምርምር ስነ-ምግባር ረቂቅ ሰነዶች በማዘጋጀት ላይ ይገኛል።

ሚኒስቴሩ በሀገራዊ የምርምር ስነ-ምግባር መመሪያ(guideline) እና “Standard Operating Procedures” ዝግጅት ዙሪያ ከባለድርሻ አካላት ጋር መክሯል፡፡

በምክክሩ መክፈቻ ላይ የሀገራዊ ምርምርና ልማት መሪ ስራ አስፈፃሚ ዶ/ር ሀብታሙ አበራ የሀገር በቀል ኢኮኖሚ ልማት ግቦችን ለማሳካት ምርምር ወሳኝ ሚና እንዳለው እና ይህ ምርምር ውጤታማ እንዲሆን ደግሞ የምርምር ስነ-ምግባርን መስፈርት ያሟላ ሊሆን እንደሚገባ ተናግረዋ።

የምርምር ስነ-ምግባር የምርምር ስራዎች በሰዎች፣ እንስሳትና በአካባቢ ላይ ጉዳት እንዳያደርሱ መጠበቅ የሚያስችል ስርዓት መሆኑንም በሰፊው አብራርተዋል፡፡

ይህን የምርምር ስርዓት ለማጠናከርና ተግባራዊ ለማድረግ አስፈላጊ የምርምር ስነ-ምግባር ሰነዶች በሚኒስቴር መስሪያ ቤቱ አማካኝነት የሚመለከታቸውን ባለድርሻ አካላት በማሳተፍ እየተዘጋጁ መሆኑን ገልፀዋል፡፡

በሰነድ ዝግጅቱ ላይ የተገኙት ባለሞያዎች በቀረቡ ሰነዶች ላይ ተጨማሪ ሙያዊ አስተያየቶችና ሀሳቦችን ሰጥተዋል፡፡

ሥነ-ምግባራዊ የምርምር ሥራዎች እንዲጎለብቱ ለማድረግና ማህበረሰቡ ከዘርፉ የሚኖረውን ተጠቃሚነት ለማሳደግ ሚኒስቴር መስሪያ ቤቱ ትኩረት ሰጥቶ እየሰራ እንደሚገኝ ተገልጿል፡፡