የኢኖቬሽንና ቴክኖሎጂ ሚኒስቴር በሀገሪቱ የዲጂታል ትራንስፎርሜሽን ጉዞ ውስጥ ወሳኝ ሚና የሚጫወቱ የሰው ሰራሽ አስተውሎት (AI) እና የዳታ ልየታ (Data Labeling) ዘርፎች ላይ ትኩረት ያደረገ የሥልጠና መርሃ ግብር አካሂዷል።

የሥልጠናውን የመክፈቻ ንግግር ያደረጉት የኢኖቬሽንና ቴክኖሎጂ ሚኒስትር ዴኤታ ዶ/ር ባይሳ በዳዳ የሰው ሰራሽ አስተውሎት (AI) እና የዳታ ልየታ (Data Labeling) በመንግስታዊና በግል ተቋማት የአገልግሎት ጥራትን ለማሻሻል ቁልፍ ቴክኖሎጂዎች መሆናቸውን ገልፀዋል።

ቴክኖሎጂው ለሀገር ውስጥ ችግሮች መፍትሄ እንዲሰጥና ሁሉንም የህብረተሰብ ክፍሎች ተጠቃሚ የሚሆንበትን ዕድል ለመፍጠር በትኩረት እየተሰራ እንደሆነ አመላክተዋል።

በሀገሪቱ የዲጂታል ኢኮኖሚ ግንባታ ላይ የሰው ኃይል ብቃት ማሳደግ ቅድሚያ የሚሰጠው ጉዳይ ነው ያሉት ሚኒስትር ዴኤታው የሰው ሰራሽ አስተውሎት (AI) እና የዳታ ልየታ (Data Labeling) በቂ እውቀት መታጠቅ በዘርፉ ላይ ሰፊ የስራ እድሎችን ለመፍጠር ያግዛል ብለዋል።

የኢኖቬሽንና ቴክኖሎጂ ሚኒስቴር መሰል ስልጠናዎችን በማስፋፋት፣ የሀገሪቱን የዲጂታል ኢኮኖሚ ምሰሶዎች ለማጠናከርና ዜጎች በቴክኖሎጂው ዘርፍ ያላቸውን ተሳትፎ ለማሳደግ በቁርጠኝነት እየሰራ መሆኑን አንስተዋል።

የስልጠናው ተሳታፊዎች ያገኙት እውቀት ወደ ተግባር በመለወጥ በሀገሪቱ የቴክኖሎጂ ሽግግር ሂደት ውስጥ የበኩላቸውን ሚና እንዲጫወቱ እንደሚያግዛቸው በመግለፅ መሰል መርሃ ግብሮች ተጠናክረው መቀጠል እንዳለባችው ጠቁመዋል።