በመጪው ኅዳር ወር በአዲስ ኢንተርናሽናል ኮንቬንሽን ማዕከል የሚካሄደውን ኤክስፖ በማስመልከት አዘጋጆቹ ጋዜጣዊ መግለጫ ሰጥተዋል።

በመግለጫው የቴክኖሎጂ ኤክስፖው የዲጂታል ኢኮኖሚ ግንባታ ስኬቶችን ፣የመሰረተ ልማትና የስነምህዳር ግንባታ ስራዎችን እንዲሁም በአይ ቲ ፓርክ የተገነቡና በግንባታ ሂደት የሚገኙ የቴክኖሎጂና ፈጠራ ልማት ስራዎችን ለማስተዋወቅ እና አለማቀፍ የቴክኖሎጂ ኢንቨስትመንት እና አጋርነት ለመሳብ እንደሚያግዝ ተገልጿል።

በዝግጅቱ ላይ የኢኖቬሽንና ቴክኖሎጂ ሚኒስትር ዴኤታ አቶ ሙሉቀን ቀሬ በዲጂታል ኢትዮጵያ 2025 ስትራቴጂ የኢትዮጵያን ዓለም አቀፍ የዲጂታል ኢኮኖሚ ተወዳዳሪነት ማሳደግ የሚያስችል አቅም ተፈጥሯል ብለዋል።

ሚኒስትር ድኤታው አያይዘውም ዘርፉን ለኢንቨስትመንት ምቹ ለማድረግ የሚያስችሉ በርካታ ስራዎች መሰራታቸውን ጠቅሰው በኤክስፖው ላይ የቴክኖሎጂ ክህሎት ያላቸው ኢትዮጵያዊያን፣ የግልና የመንግስት ኩባንያዎች የነቃ ተሳትፎ ማድረግ እንደሚገባቸውም መልዕክታቸውን አስተላልፈዋል።

የኢኖቬሽንና ቴክኖሎጂ ሚኒስቴር የሚኒስትሩ ከፍተኛ አማካሪ ዶ/ር አቢዮት ባዩ ኤክስፖው በዘርፉ ያሉ የኢንቨስትመንት ዕድሎችን በማስተዋወቅ ባለሃብቶችን ለመሳብ እንደሚያግዝ አመልክተዋል፡፡

በዲጂታል ኢትዮጵያ 2025 ስትራቴጂ የተገኙ ውጤቶችን ወደ ቀጣይ ምዕራፍ ለማሸጋገር የሚያስችል ግብዓት ለመሰብሰብና ቀጣዩን የዲጂታል ኢትዮጵያ 2030 ስትራቴጂ ለማስተዋወቅ ዕድል ይፈጥራልም ብለዋል።

የኢትዮጵያ የአይ ቲ ፓርክ ዋና ሥራ አስፈፃሚ አቶ ሔኖክ አሕመድ ፓርኩ ዲጂታል ኢትዮጵያን እውን ለማድረግ የሚጠበቅበትን ስራ በመስራት ላይ እንደሚገኝ ገልጸው ኤክስፖው በአይ ቲ ፓርክ የተገነቡና በግንባታ ሂደት የሚገኙ የቴክኖሎጂና ፈጠራ ልማት ስራዎችን ለማስተዋወቅ መልካም አጋጣሚ እንደሚሆን ተናግረዋል ።

በመግለጫው በዲጂታል ኢትዮጵያ 2025 ስትራቴጂ የተመዘገቡ ስኬቶች ፣የዘርፉ ምቹ ስነ ምህዳር ግንባታ ስራዎች እንደሚቀርቡበትም ተጠቁሟል።

ኤክስፖው የመንግስትና የግል ቴክኖሎጂ ልማት አጋርነትን የሚያሳድግ መሆኑን የገለጹት የRcndc አማካሪ ድርጅት ዋና ሥራ አስፈፃሚ አቶ ሬድዋን አብዱ ዝግጅቱ የግሉ ዘርፍ አጋርነት እና ተሳትፎን የሚያበረታታ መሆኑን ገልጸዋል።

መግለጫውን የኢኖቬሽንና ቴክኖሎጂ ሚኒስትር ዴኤታ አቶ ሙሉቀን ቀሬ፣ የኢትዮጵያ የአይ ቲ ፓርክ ዋና ሥራ አስፈፃሚ ሔኖክ አሕመድ፣ የኢኖቬሽንና ቴክኖሎጂ ሚኒስትር ከፍተኛ አማካሪ አብዮት ባዩ (ዶ/ር) እና የRcndc አማካሪ ድርጅት ዋና ሥራ አስፈፃሚ ሬድዋን አብዱ በጋራ ሰጥተዋል።