የኢኖቬሽንና ቴክኖሎጂ ሚኒስቴር በዲጂታል ፋውንዴሽን ፕሮጀክት ከዓለም ባንክ በተገኘ የገንዘብ ድጋፍ በተመረጡ 10 የፌደራል ተቋማት፣ በ12 ክልሎችና በ2 የከተማ መስተዳደሮች ያስገነባውን የስማርት ኮሚኒኬሽን ክፍሎች ግንባታ ፕሮጀክት የተጠቃሚ ተቋማት የስራ ሀላፊዎችና ባለሙያዎች በተገኙበት የማጠናቀቂያ ፕሮግራም አካሂዷል፡፡

ፕሮግራሙ የስማርት ኮሚኒኬሽን ክፍሎች የተገነቡበት አላማ ተግባራዊነት ላይ ለመምከር፣ በግንባታው ሂደት ላይ የተገኙ ተሞክሮዎችን ለመቀመርና ለቀጣይ በግብዓትነት ለመጠቀም እና ለፕሮጄክቱ መሳካት አስተዋፅኦ ላበረከቱ ምስጋና ለማቅረብ ያለመ ነው፡፡

የኢኖቬሽንና ቴክኖሎጂ ሚስትር ዴኤታ ዶ/ር ይሹሩን ዓለማየሁ በሁሉም የሀገሪቱ ክፍል ተደራሽ የሆነ የዲጂታል ስርዓት በመገንባት የማህበረሰቡን አገልግሎት ለማዘመን ዘርፈ ብዙ ስራዎች እየተሰሩ መሆናቸውን አስገንዝበዋል፡፡

የዲጂታል ዘርፉን ለሁሉም ተደራሽ ለማድረግ ፍላጎትና ቅንጅት ወሳኝ ሚና አለው ያሉት ሚኒስትር ዴኤታው ሁሉም ተቋማት ወደ መሶብ የአንድ ማዕከል አገልግሎት በመግባት ተገልጋዮች ያለምንም እንግልት፣ ገንዘባቸውንና ጊዜያቸውን ቆጥበው ጥራት ያለው አገልግሎት እንዲያገኙ ማስቻል ይጠበቅብናል ብለዋል፡፡

የኢኖቬሽንና ቴክኖሎጂ ሚኒስቴር የአይሲቲ መሠረተ ልማት ግንባታና አስተዳደር መሪ ስራ አስፈፃሚ አቶ ዮናስ ኃይሉ ተቋማት የዲጂታል ተጠቃሚነታቸው እንዲረጋገጥ በትብብር ላይ የተመሰረተ መሰረተ ልማትን ለማሟላት ከሚሰሩ ስራዎች የስማርት ኮሚኒኬሽን ክፍሎች ግንባታ ፕሮጀክት አንዱ ማሳያ ነው ብለዋል፡፡

የዲጂታል ስርዓቱን ለማስፋት የዘርፉ ተዋናይ ከሆኑት ተቋማት ጋር የተጠናከረ ግኑኝነት በመፍጠር ለስራ ሀላፊዎችና ባለሙያዎች የስራ ላይ ስልጠናና በአጠቃቀም ዙሪያ ስልጠና በመሰጠቱ ፕሮጀክቱን ስኬታማ መሆኑን ገልፀዋል፡፡

በመጨረሻም ለፕሮጀክቱ ስኬት አስተዋፆ ላበረከቱ ባለሙያዎችና ተሳታፊዎች የምስጋና መርሃ ግብር ተካሂዷል፡፡