የኢኖቬሽንና ቴክኖሎጂ ሚኒስቴርና የተጠሪ ተቋማት ከፍተኛና መካከለኛ አመራሮች በአዲስ አበባ መሶብ የአንድ ማዕከል ዲጂታል የመንግስት አገልግሎትን ተዟዙረው በመጎብኘት በጋራ ጉዳዮች ላይ መክረዋል፡፡

የኢኖቬሽንና ቴክኖሎጂ ሚኒስትር ዶ/ር በለጠ ሞላ በሀገራችን የዲጂታል ዘርፉን በመጠቀም የሲቪል ሰርቪሱን ቀልጣፋና የዘመናዊ አገልግሎት ተጠቃሚነት ለማረጋገጥ የተሄደበት ርቀት ለክልሎችና ለዘርፉ ተዋናዮች በሞዴልነት የሚወሰድ መሆኑን ገልፀዋል፡፡

ኢትዮጵያ ያላትን ስፋትና የህዝብ ቁጥር ከግምት ውስጥ በማስገባት በሺዎች የሚቆጠሩ አገልግሎቶችን በፍጥነት ወደ ዲጂታል መቀየር የለውጥ ጉዟችንን ከማፋጠን ባሻገር በመንግስትና በህዝብ መካከል ጠንካራ መተማመን ይፈጥራል ብለዋል።

የቀደሙ የዜጎች ስብራቶች በዘመነ የዲጂታል ቴክኖሎጂ አገልግሎት ማከም ይቻላል ያሉት ሚኒስትሩ የሰው ልጅን ክብር የሚመጥን ምቹ አካባቢን ፈጥረን እርካታ የሚፈጥር አገልግሎት ስንሰጥ ሀገር ወዳድ ዜጋ ማፍራት እንደሚያስችል አስገንዝበዋል፡፡

የዲጂታል ኢትዮጵያ 2030 ፍኖት ተከትሎ የዘመነ ሀገር ለመፍጠር ለሚደረገው ጥረት የአዲስ መሶብ የአንድ ማዕከል ማሳያ መሆኑን ተናግረዋል፡፡

የአዲስ መሶብ ዋና ዳይሬክተር አቶ ዮናስ አለማየሁ የመሶብ አንድ ማዕከል ዲጂታል የመንግስት አገልግሎትን በማዘመንና ጊዜውን የዋጀ ቴክኖሎጂን በአግባቡ በመታጠቅ ለኢትዮጵያ ፍቱን መድኃኒት ማግኘት እንችላለን ብለዋል።

የአንድ ማዕከል አገልግሎቶችን በማስፋትና አዳዲስ አሰራሮችን በመጨመር፣ የዲጂታል ኢትዮጵያ ጉዞን ዳር ለማድረስ ቁርጠኛ መሆናቸውን ተናግረዋል።

በመጨረሻም የኢኖቬሽንና ቴክኖሎጂ ሚኒስትር ዶ/ር በለጠ ሞላ፤ የዲጂታል ኢትዮጵያ 2030 ስትራቴጂን ለማሳካት የጎላ ድርሻ እያበረከተ ለሚገኘው 'አዲስ መሶብ' የአንድ ማዕከል አገልግሎት፣ ሚኒስቴር መስሪያ ቤታቸው አስፈላጊውን የቴክኒክ ድጋፍ እንደሚያደርግ ገልጸዋል።