የኢኖቬሽንና ቴክኖሎጂ ሚኒስትር ዶ/ር በለጠ ሞላ፣ በዓለም ባንክ ማኔጂንግ ዳይሬክተር እና ዋና አስተዳዳሪ ዶ/ር ዌንካይ ዣንግ (Wencai Zhang Managing Director & Chief Administrative Officer World Bank Group) የተመራውን የልዑካን ቡድን በጽህፈት ቤታቸው ተቀብለው በጋራ ጉዳዮች ላይ ተወያዩ።

በውይይቱም በዓለም ባንክ ድጋፍ እየተከናወኑ በሚገኙ ፕሮጀክት ስራዎች አፈጻጸም እና በቀጣይ የትኩረት አቅጣጫዎች ላይ ሰፊ ምክክር አድርገዋል።

የኢኖቬሽንና ቴክኖሎጂ ሚኒስትር ዶ/ር በለጠ ሞላ "ዲጂታል ኢትዮጵያ 2025" ስትራቴጂን በስኬት በማጠናቀቅ፣ ከሀገራዊ የኢኮኖሚ ዕድገት ባለፈ በዓለም አቀፍ ደረጃ ተወዳዳሪ ለመሆን የሚያስችለውን "የዲጂታል ኢትዮጵያ 2030" ስትራቴጂን በመተግበር ላይ መሆናቸውን አስገንዝበዋል።

የአለም ባንክ ትብብር ለሀገራችን የዲጂታል ትራንስፎርሜሽን ጉዞ ስኬት የላቀ ሚና እንደነበረው የገለፁት ሚኒስትሩ በኢትዮጵያ ለሚከናወኑ ዘርፈ ብዙ ስራዎች አስፈላጊውን ድጋፍና ትብብሩ ሊያጠናክር እንደሚገባ አንስተዋል፡፡

ኢትዮጵያ በማደግ ላይ ያለች ሰፊ ሀገር በመሆኗ በሳይንስ፣ በቴክኖሎጂና በኢኖቬሽን ዘርፍ የምታከናውናቸው ተግባራት ለሀገራዊ ዕድገት ብቻ ሳይሆን ለአጎራባች ሀገራት የኢኮኖሚ ትስስርና ልዕልና ጭምር ፋይዳ እንዳላቸው ገልፀዋል።

የዓለም ባንክ ማኔጂንግ ዳይሬክተርና ዋና አስተዳዳሪ ዌንካይ ዣንግ (ዶ/ር) በበኩላቸው ኢትዮጵያ በዲጂታል ኢኮኖሚ ግንባታ ላይ እያከናወነች ያለችው ሥራ የሚበረታታ መሆኑን ጠቅሰው፣ በቀጣይም የዓለም ኢኮኖሚ ትኩረት ባደረገባቸው የቴክኖሎጂ ዘርፎች ላይ ትብብሩ ተጠናክሮ እንደሚቀጥል ተናግረዋል።

በዓለም ባንክ ድጋፍ እየተከናወኑ በሚገኙ የዲጂታል ፕሮጀክት ስራዎች የአፈፃፀም ሪፖርት የቀረበ ሲሆን የተገኙ ውጤቶች ስኬታማ መሆናቸውን በውይይቱ ላይ ተገልጿል።